na chhoDa dil-e-KHasta-jaan chalte chalte

na chhoḌā dil-e-ḳhasta-jāñ chalte chalte

ġhazab kar chale mehrbāñ chalte chalte

kaheñge kuchh ai bāġhbāñ chalte chalte

agar degī yaarā zabāñ chalte chalte

gire ham pas-e-kārvāñ chalte chalte

thake paañv apne kahāñ chalte chalte

tirī chaal bād-e-ḳhizāñ ne uḌaa.ī

ujāḌā mirā āshiyāñ chalte chalte

karo āñkheñ jhapkā ke tirchhī nigāheñ

sināneñ chalīñ barchhiyāñ chalte chalte

bhareñ sard aaheñ jo garm aah bhar ke

nasīm aa.ī bād-e-ḳhizāñ chalte chalte

na ghabrā zarā dāman-e-roz-e-mahshar

karūñgā tirī dhajjiyāñ chalte chalte

adam ko chale qaid zulf-e-sanam meñ

raheñ paañv meñ beḌiyāñ chalte chalte

dam-e-naz.a sar par gire koh-e-ulfat

uThā.īñ baḌī saḳhtiyāñ chalte chalte

mirī laash ko paañv se ḳhuub rauñdā

thame sūrat-e-āsmāñ chalte chalte

bas ab to adam meñ mulāqāt hogī

ye kahte ga.e raftagāñ chalte chalte

na qātil ne teġh-e-nigah tak lagā.ī

na kartā gayā imtihāñ chalte chalte

jahāñ se ga.e hashr tak ḳhuub so.e

liyā saath ḳhvāb-e-girāñ chalte chalte

rahe umr-bhar terī vahdat ke qaa.il

na liiñ ham ne do hichkiyāñ chalte chalte

'rashīd'-e-hazīñ laakh rokā kiye ham

vo lete ga.e naqd-e-jāñ chalte chalte

na chhoDa dil-e-KHasta-jaan chalte chalte

ghazab kar chale mehrban chalte chalte

kahenge kuchh ai baghban chalte chalte

agar degi yara zaban chalte chalte

gire hum pas-e-karwan chalte chalte

thake panw apne kahan chalte chalte

teri chaal baad-e-KHizan ne uDai

ujaDa mera aashiyan chalte chalte

karo aankhen jhapka ke tirchhi nigahen

sinanen chalin barchhiyan chalte chalte

bharen sard aahen jo garm aah bhar ke

nasim aai baad-e-KHizan chalte chalte

na ghabra zara daman-e-roz-e-mahshar

karunga teri dhajjiyan chalte chalte

adam ko chale qaid zulf-e-sanam mein

rahen panw mein beDiyan chalte chalte

dam-e-naza sar par gire koh-e-ulfat

uThain baDi saKHtiyan chalte chalte

meri lash ko panw se KHub raunda

thame surat-e-asman chalte chalte

bas ab to adam mein mulaqat hogi

ye kahte gae raftagan chalte chalte

na qatil ne tegh-e-nigah tak lagai

na karta gaya imtihan chalte chalte

jahan se gae hashr tak KHub soe

liya sath KHwab-e-giran chalte chalte

rahe umr-bhar teri wahdat ke qail

na lin hum ne do hichkiyan chalte chalte

'rashid'-e-hazin lakh roka kiye hum

wo lete gae naqd-e-jaan chalte chalte