نہ تجلیاں نہ تسلیاں نہ سلام ہے نہ کلام ہے

نہ تجلیاں نہ تسلیاں نہ سلام ہے نہ کلام ہے

تری جلوہ گاہ خیال میں بھی سکوت ہی کا پیام ہے

ابھی حسن محو خرام ہے ابھی شوخ جلوۂ عام ہے

کبھی خلوتوں میں بھی رام ہے کہ تخیلات کا دام ہے

نہ وہ آرزوئیں زباں زباں نہ وہ حسرتیں ہیں نظر نظر

تری انجمن نہ وہ انجمن نہ وہ شوق ہی کا مقام ہے

نہ وہ طور ناز کی بجلیاں نہ کلیم عشق کی شوخیاں

نہ وہ رونقیں نہ وہ عشرتیں نہ وہ صبح ہے نہ وہ شام ہے

جو شراب حسن و جمال میں بھی ہیں بوالہوس کی ملاوٹیں

دل مے پرست ہے خوں فشاں کہ یہ میکدے کا نظام ہے

دم کائنات فغاں فغاں غم ممکنات ہے جاں ستاں

یہ تصورات دھواں دھواں کہ عدم وجود کا نام ہے

ہے نشان‌ زخم سبو سبو یہاں ساغروں میں لہو لہو

یہ بکا یہ نالہ یہ ہچکیاں یہ فغان شیشہ و جام ہے

مری آہ رونق انجمن ہے صدائے درد سخن سخن

تری پردگی کا یہ بانکپن کہاں جلوہ ہے کہاں بام ہے

ہے تلاش حسن مکاں مکاں وہی جستجو ہے زماں زماں

یہ فریب اخترؔ خوش گماں دل مبتلا کا ہی کام ہے