nazar se dur rahe mujhko aazmae bhi

nazar se duur rahe mujh ko āzmā.e bhī

agar vo vaqt nahīñ hai to lauT aa.e bhī

hai ābshār to ehsās ko kare sairāb

vo pyaas hai to mirī tishnagī baḌhā.e bhī

vo mauj hai to mujhe ġharq bhī zarūr kare

hai nāḳhudā to bhañvar se nikāl laa.e bhī

vo ḳhvāb hai to kare bas qayām āñkhoñ meñ

agar hai ḳhauf to nīñdeñ mirī uḌaa.e bhī

vo mas.ala hai to merī jabīñ pe raushan ho

vo koī hal hai to dil ko qarār aa.e bhī

nazar-shanās na ho to mujhe bhī taḌpā.e

vo dil-navāz agar hai to maan jaa.e bhī

agar vo aur koī hai to koī baat nahīñ

hai zindagī to añdheroñ meñ gungunā.e bhī

nazar se dur rahe mujh ko aazmae bhi

agar wo waqt nahin hai to lauT aae bhi

hai aabshaar to ehsas ko kare sairab

wo pyas hai to meri tishnagi baDhae bhi

wo mauj hai to mujhe gharq bhi zarur kare

hai naKHuda to bhanwar se nikal lae bhi

wo KHwab hai to kare bas qayam aankhon mein

agar hai KHauf to ninden meri uDae bhi

wo masala hai to meri jabin pe raushan ho

wo koi hal hai to dil ko qarar aae bhi

nazar-shanas na ho to mujhe bhi taDpae

wo dil-nawaz agar hai to man jae bhi

agar wo aur koi hai to koi baat nahin

hai zindagi to andheron mein gungunae bhi