نگاہ دل سے جو گزرا تو پھر ستارہ ہوا

نگاہ دل سے جو گزرا تو پھر ستارہ ہوا

وہ چاند میرے سخن کا جو استعارہ ہوا

تمہارے دید سے پہلے وہ ایک منظر تھا

تمہاری آنکھ نے دیکھا تو اک نظارہ ہوا

زمین دل پہ سخن کا نزول ہوتا رہا

کسی نظر کے ہنر کا جوں ہی اشارہ ہوا

سخن یہ شب کا گزاری ہوئی وہ صبح وصال

حیات حسن کا اتنا ہی گوشوارہ ہوا

وہ رنگ ساز رہا غرق فکر رنگیں میں

وہ حسن زیست میں اک دل نشیں ادارہ ہوا

وہ یوں طلوع ہوا لے کے عکس تابندہ

کہ جیسے جھیل میں اک چاند ہو اتارا ہوا

وہ شاہزادہ محبت کے پیرہن میں ڈھلا

وہ خود سری و انا و غرور ہارا ہوا