نکل پڑے ہیں جو تیری خاطر انہیں پہ تیرا عتاب کیوں ہے

نکل پڑے ہیں جو تیری خاطر انہیں پہ تیرا عتاب کیوں ہے

سروں پہ سورج دلوں میں الجھن نظر سراسر سراب کیوں ہے

تمام سمتیں تمام رستے تمام نقش و نگار تیرے

زمیں بھی تیری فلک بھی تیرا تو پھر مسافت عذاب کیوں ہے

کوئی سکندر کوئی قلندر کبھی نہ پل بھر کو روک پایا

سمند عمر رواں ہمیشہ سے بے زمام و رکاب کیوں ہے

زمانے بھر کے دکھوں کو بانٹوں کہ اپنی بے چارگی کو روؤں

مرے ہی دامن میں سب کا صحرا مجھی سے برہم سحاب کیوں ہے

سیاہ بادل خنک ہوائیں گھنا اندھیرا طویل رستہ

ابھی تو عزم سفر کیا ہے ابھی سے موسم خراب کیوں ہے