nok-e-KHanjar pe saje sar nahin dekhe jate

nok-e-ḳhanjar pe saje sar nahīñ dekhe jaate

ḳhūñ-chakāñ roz ke manzar nahīñ dekhe jaate

zulm vāloñ ke makāñ hoñ ki vo mazlūmoñ ke

ham se bastī ke jale ghar nahīñ dekhe jaate

maslahat-kosh nahīñ haq ke taraf-dār haiñ ham

farz ke sāmne patthar nahīñ dekhe jaate

had se baḌh jaa.e agar nashsha-e-bedād-garī

apne begānoñ ke phir sar nahīñ dekhe jaate

ho khulā haath nazar aa.eñ lakīreñ us kī

band muTThī meñ muqaddar nahīñ dekhe jaate

rang tasvīr ke andar hī bhale lagte haiñ

rang tasvīr ke bāhar nahīñ dekhe jaate

ab faqat chehroñ pe rahtī hai zamāne kī nazar

ab kisī shaḳhs ke jauhar nahīñ dekhe jaate

harf-e-haq aaj bhī hai ahl-e-vafā ke lab par

aaj vo dār-o-rasan par nahīñ dekhe jaate

dāman-e-ahl-e-hunar meñ nahīñ kyā chiiz 'azīz'

fikr-o-ehsās ke gauhar nahīñ dekhe jaate

nok-e-KHanjar pe saje sar nahin dekhe jate

KHun-chakan roz ke manzar nahin dekhe jate

zulm walon ke makan hon ki wo mazlumon ke

hum se basti ke jale ghar nahin dekhe jate

maslahat-kosh nahin haq ke taraf-dar hain hum

farz ke samne patthar nahin dekhe jate

had se baDh jae agar nashsha-e-bedad-gari

apne beganon ke phir sar nahin dekhe jate

ho khula hath nazar aaen lakiren us ki

band muTThi mein muqaddar nahin dekhe jate

rang taswir ke andar hi bhale lagte hain

rang taswir ke bahar nahin dekhe jate

ab faqat chehron pe rahti hai zamane ki nazar

ab kisi shaKHs ke jauhar nahin dekhe jate

harf-e-haq aaj bhi hai ahl-e-wafa ke lab par

aaj wo dar-o-rasan par nahin dekhe jate

daman-e-ahl-e-hunar mein nahin kya chiz 'aziz'

fikr-o-ehsas ke gauhar nahin dekhe jate