پانی پر اک پھول اگایا اس پہ سجائی تتلی

پانی پر اک پھول اگایا اس پہ سجائی تتلی

اک تالاب میں باغ بنایا بیچ بٹھائی تتلی

ٹہنی ٹہنی توڑ رہا تھا جب یہ سرخ گلاب

کیا اس وقت ذرا بھی تجھ کو یاد نہ آئی تتلی

میں نے عشق کی بیل لگائی اس پر اگائیں کلیاں

کلیاں پھول بنیں تو آ کر اس نے اڑائی تتلی

اس کے لمس سے زرد ہوئے جاتے ہیں سرخ گلاب

کیسی پیاس بجھانے آئی ہے صحرائی تتلی

پوچھا تھا درویش سے میں نے پیار ہے کیا اور اس نے

کاغذ پر اک پھول بنایا ساتھ بنائی تتلی

گلشن گلشن اس کا پیچھا کرتا پھرے ہے بھنورا

اپنی باس سے پھولوں نے ایسے مہکائی تتلی

ست رنگی کرنوں کی جھلمل پتی پتی اوس

پھول پلنگ پہ لیٹ کے عاصمؔ دھوپ نہائی تتلی