پانی سے دور رہ کے بھی تیراک ہو گئے

پانی سے دور رہ کے بھی تیراک ہو گئے

اب سادہ لوح لوگ بھی چالاک ہو گئے

مانند برق یا کہ تھا وہ صورت شرر

ایسے نظر اٹھائی کہ ہم خاک ہو گئے

مشکل نہ تھی تو ڈرتے نہیں تھے کسی سے ہم

مشکل میں آ کے اور بھی بے باک ہو گئے

تنہا رہے تو خود کا پتہ تھا نہ غیب کا

ان سے ملے تو صاحب ادراک ہو گئے

ہم کو اچھوت جان کے دیکھو نہ دور سے

چھو کر ہمیں بھی لوگ کئی پاک ہو گئے

کی بندگی رسول خدا کی تو دیکھیے

ہم بھی خیالؔ شاعر لولاک ہو گئے