pahunchi hai kis tarah mere lab tak nahin pata

pahuñchī hai kis tarah mire lab tak nahīñ pata

vo baat jis kā ḳhud mujhe ab tak nahīñ pata

achchhā maiñ haath uThā.ūñ batā.ūñ fulāñ fulāñ

yā'nī ḳhudā ko merī talab tak nahīñ pata

ik din udāsiyoñ kī davā DhūñDh leñge log

ham log hoñge yā nahīñ tab tak nahīñ pata

kab se hai kis qadar hai ye kaise pata chale

mujh ko to is junūñ kā sabab tak nahīñ pata

maiñ aaj kāmyāb huuñ ḳhush-bāsh huuñ magar

kyā fā.eda hai yaar use jab tak nahīñ pata

jis ke sabab maiñ ahl-e-mohabbat ke saath huuñ

vo shaḳhs mere saath hai kab tak nahīñ pata

ham kyā ḳhushī ġhamī kī mahāfil meñ hoñ sharīk

ham ko to farq-e-ranj-o-tarab tak nahīñ pata

pahunchi hai kis tarah mere lab tak nahin pata

wo baat jis ka KHud mujhe ab tak nahin pata

achchha main hath uThaun bataun fulan fulan

ya'ni KHuda ko meri talab tak nahin pata

ek din udasiyon ki dawa DhunDh lenge log

hum log honge ya nahin tab tak nahin pata

kab se hai kis qadar hai ye kaise pata chale

mujh ko to is junun ka sabab tak nahin pata

main aaj kaamyab hun KHush-bash hun magar

kya faeda hai yar use jab tak nahin pata

jis ke sabab main ahl-e-mohabbat ke sath hun

wo shaKHs mere sath hai kab tak nahin pata

hum kya KHushi ghami ki mahafil mein hon sharik

hum ko to farq-e-ranj-o-tarab tak nahin pata