پریشان حال دامن دھجیاں صورت فقیرانہ

پریشان حال دامن دھجیاں صورت فقیرانہ

یہ تیرا طالب ناشاد ہے یا کوئی دیوانہ

نہ ہو کچھ اور تو اتنی ہی نسبت تجھ سے ہو جائے

جدھر جاؤں زمانہ مجھ کو سمجھے تیرا دیوانہ

کوئی تو بات ہے جو شمع کے آنسو نہیں تھمتے

ابھی کیا کہتے کہتے ہو گیا خاموش پروانہ

ہزاروں حسرتیں آباد ہیں لاکھوں تمنائیں

اسی دل میں بظاہر جو نظر آتا ہے ویرانہ

پلا دے میکدہ بر دوش آنکھوں سے مجھے ساقی

اٹھا لے میرے آگے سے یہ شیشہ اور پیمانہ

مری روداد غم کی اللہ اللہ یہ ہمہ گیری

سمجھتا ہے اسے ہر سننے والا اپنا افسانہ

محبت کی نہ ہو گر کار فرمائی تو دنیا میں

ہجوم بلبل و گل ہو نہ بزم شمع و پروانہ

جناب ناصح مشفق ہیں کچھ کھوئے ہوئے طالبؔ

کسی کافر کو شاید دیکھ آئے بے حجابانہ