پرندہ پھر صفر پر جا رہا ہے

پرندہ پھر صفر پر جا رہا ہے

شجر پر ہجر کا موسم ہوا ہے

وہ اپنی ذات سے باہر نکل کر

جہاں میں مارا مارا پھر رہا ہے

ان آنکھوں نے تو منظر قید رکھے

ترا چہرہ مگر دھندلا گیا ہے

مہکتے ہی نہیں شفقت سے آنگن

دعا کا پھول کیا مرجھا گیا ہے

سلامت ہے ابھی تک شہر اپنا

یہ اپنے آپ میں اک حادثہ ہے

اسی لمحہ کو ہو جانا ہے حاصل

وہ اک لمحہ جو ہونے سے ورا ہے

ہمارے واسطے ہونے کی صورت

وہی ہے جو نہیں اب تک ہوا ہے

بدل کر بھیس پھر دریا کا ثانیؔ

سمندر اپنے اندر لوٹتا ہے