پھل جب بھی روشنی کے شجر نے نہیں دیا

پھل جب بھی روشنی کے شجر نے نہیں دیا

منظر کشید کر کے نظر نے نہیں دیا

اک لمحۂ وصال ملا ہے تو پھر اسے

ہم نے تمام عمر گزرنے نہیں دیا

اک عشق ہے کہ ہم نے نبھایا ہے مستقل

اک زخم ہے جسے کبھی بھرنے نہیں دیا

کیا ہو اگر ہو وقت کی رفتار مختلف

اس نے مجھے یہ تجربہ کرنے نہیں دیا

بے جان جسم رکھ دئے مصنوعی سانس پر

جو مر رہے تھے کیوں انہیں مرنے نہیں دیا

عاصمؔ اسی نے بھوک میں لقمہ دیا مجھے

جس نے شدید خوف میں ڈرنے نہیں دیا