pukarta hun paDa regzar mein ab bhi

pukārtā huuñ paḌā regzār meñ ab bhī

koī to hogā mire intizār meñ ab bhī

laraztā haath bharī aañkh ġham-zada chehra

dikhā.ī dete haiñ mujh ko ġhubār meñ ab bhī

har ek chiiz se uktā gayā hai dil apnā

vahī kashish hai magar husn-e-yār meñ ab bhī

mujhe pata hai vo kab kī chalī ga.ī hogī

khaḌā huā huuñ maiñ bus kī qatār meñ ab bhī

zarā Thahar maiñ abhī toḌ-phoḌ Dālūñgā

ye kā.enāt hai mere hisār meñ ab bhī

zamāna ho gayā tum se mile hue 'alvī'

tumhārā naam hai yāroñ ke yaar meñ ab bhī

pukarta hun paDa regzar mein ab bhi

koi to hoga mere intizar mein ab bhi

larazta hath bhari aankh gham-zada chehra

dikhai dete hain mujh ko ghubar mein ab bhi

har ek chiz se ukta gaya hai dil apna

wahi kashish hai magar husn-e-yar mein ab bhi

mujhe pata hai wo kab ki chali gai hogi

khaDa hua hun main bus ki qatar mein ab bhi

zara Thahar main abhi toD-phoD Dalunga

ye kaenat hai mere hisar mein ab bhi

zamana ho gaya tum se mile hue 'alwi'

tumhaara nam hai yaron ke yar mein ab bhi