پکارتا ہوں پڑا ریگزار میں اب بھی

پکارتا ہوں پڑا ریگزار میں اب بھی

کوئی تو ہوگا مرے انتظار میں اب بھی

لرزتا ہاتھ بھری آنکھ غم زدہ چہرہ

دکھائی دیتے ہیں مجھ کو غبار میں اب بھی

ہر ایک چیز سے اکتا گیا ہے دل اپنا

وہی کشش ہے مگر حسن یار میں اب بھی

مجھے پتہ ہے وہ کب کی چلی گئی ہوگی

کھڑا ہوا ہوں میں بس کی قطار میں اب بھی

ذرا ٹھہر میں ابھی توڑ پھوڑ ڈالوں گا

یہ کائنات ہے میرے حصار میں اب بھی

زمانہ ہو گیا تم سے ملے ہوئے علویؔ

تمہارا نام ہے یاروں کے یار میں اب بھی