قلیل آپ نہیں اور ہم کثیر نہیں

قلیل آپ نہیں اور ہم کثیر نہیں

حقوق سب کے ہیں یکساں کوئی حقیر نہیں

جو وقت آئے تو میرا بھی امتحاں لے لو

وفا شعار ہوں مردہ مرا ضمیر نہیں

پڑے جو وقت تو فولاد سے بھی ٹکرائے

مرا وجود فقط خاک کا خمیر نہیں

مرے وجود سے نفرت تمہیں ہے کیا معنی

بہت اہم ہوں تمہارے لئے حقیر نہیں

بھری بہار میں منظر خزاں کا لگتا ہے

چمن میں پھول قفس میں کوئی اسیر نہیں

دراز کوئی بھی کرتا نہیں ہے دست طلب

ہمارے شہر میں شاید کوئی فقیر نہیں

کہیں وہ اپنی ڈگر سے بھٹک نہ جائے حبیبؔ

رہ طلب کی جماعت کا جب امیر نہیں