رائیگاں جا رہی ہے ہر کوشش

رائیگاں جا رہی ہے ہر کوشش

ہم نہیں چھوڑتے مگر کوشش

دل کی آئے گی بعد میں باری

کر رہی ہے ابھی نظر کوشش

غیر ممکن سہی وصال دوست

ہے ضروری بساط بھر کوشش

کی نہ جائے اگر سلیقے سے

ڈال سکتی ہے کیا اثر کوشش

ایک در ہو کھلا ہوا تو بھلا

کیوں کرے کوئی دربدر کوشش

آدمی کو زمین سے اکثر

لے گئی آسمان پر کوشش

ان سے خط کا جواب لینے کی

کر رہا ہوگا نامہ بر کوشش

سوکھ جاتی ہے جب زبان مری

کرنے لگتی ہے چشم تر کوشش

سل گئے نا شعورؔ تیرے ہونٹھ

اور سچ بولنے کی کر کوشش