راہوں میں حادثے ہیں کرامات لے چلیں

راہوں میں حادثے ہیں کرامات لے چلیں

گھر سے چلیں تو ماں کی دعا ساتھ لے چلیں

ہوش و خرد کے سائے میں منزل کسے ملی

چلئے جنون شوق کی خدمات لے چلیں

جن میں غم حیات کا کچھ تذکرہ نہ ہو

اس شہر میں ملیں تو وہ حالات لے چلیں

جدت کا ہو سفر یہ مناسب تو ہے مگر

اسلاف کی بھی کچھ تو روایات لے چلیں

زاد سفر یہی ہے ہمیشہ سفر میں ساتھ

ماضی کے تجربوں کی ہدایات لے چلیں

اک بار لوٹ آئی جو اس بارگاہ میں

پھر اس کی بارگاہ میں وہ بات لے چلیں

اس شہر میں رواج ستائش نہیں چلو

اشہرؔ یہاں سے اپنے کمالات لے چلیں