raat bhar pi ke laDkhaDate raho

raat bhar pī ke laḌkhaḌāte raho

sub.h masjid meñ sar jhukāte raho

toḌ Daalo tilism-e-bū-e-gul

mausam-e-gul meñ ḳhaak uḌāte raho

mahl tā'mīr kar lo dariyā meñ

ret meñ kashtiyāñ chalāte raho

hijr kī shab guzar hī jā.egī

taaza filmoñ ke giit gaate raho

phūñs meñ aag dhar ke haT jaao

chain kī bāñsurī bajāte raho

mat Daro nanhe-munne oloñ se

be-dhaḌak apnā sar muñDāte raho

sab raqīboñ se dostī kar lo

man-ghaḌat vasl kī sunāte raho

ab bhī milte haiñ gāñTh ke puure

DhūñDh lo aur udhār khāte raho

naam rakh lo ḳhalīl ḳhaañ apnā

aur phir fāḳhta uḌāte raho

log maġhlūb ho hī jā.eñge

she'r ġhālib ke gungunāte raho

ham bhī ustād haiñ suno 'alvī'

apnī ġhazleñ hameñ dikhāte raho

raat bhar pi ke laDkhaDate raho

subh masjid mein sar jhukate raho

toD Dalo tilism-e-bu-e-gul

mausam-e-gul mein KHak uDate raho

mahl ta'mir kar lo dariya mein

ret mein kashtiyan chalate raho

hijr ki shab guzar hi jaegi

taza filmon ke git gate raho

phuns mein aag dhar ke haT jao

chain ki bansuri bajate raho

mat Daro nanhe-munne olon se

be-dhaDak apna sar munDate raho

sab raqibon se dosti kar lo

man-ghaDat wasl ki sunate raho

ab bhi milte hain ganTh ke pure

DhunDh lo aur udhaar khate raho

nam rakh lo KHalil KHan apna

aur phir faKHta uDate raho

log maghlub ho hi jaenge

she'r ghaalib ke gungunate raho

hum bhi ustad hain suno 'alwi'

apni ghazlen hamein dikhate raho