رفتہ رفتہ منظر شب تاب بھی آ جائیں گے

رفتہ رفتہ منظر شب تاب بھی آ جائیں گے

نیند تو آ جائے پہلے خواب بھی آ جائیں گے

کیا پتہ تھا خون کے آنسو رلا دیں گے مجھے

اس کہانی میں کچھ ایسے باب بھی آ جائیں گے

خشک آنکھوں نے تو شاید یہ کبھی سوچا نہ تھا

ایک دن صحراؤں میں سیلاب بھی آ جائیں گے

حوصلے یوں ہی اگر بڑھتے گئے تو دیکھنا

ساحلوں تک ایک دن گرداب بھی آ جائیں گے

بس ذرا ملنے تو دو میری تباہی کی خبر

دل دکھانے کے لیے احباب بھی آ جائیں گے

آپ کی بزم مہذب میں نیا ہوں شادؔ میں

آتے آتے بزم کے آداب بھی آ جائیں گے