رگوں کا خون سخن میں نچوڑ کر رکھ دوں

رگوں کا خون سخن میں نچوڑ کر رکھ دوں

بساط عجز پہ کیا چاہیے یہ سر رکھ دوں

خدائے عشق کی ضو ریزیاں تمام ہوئیں

مآل کار ہنر یہ ہے اب ہنر رکھ دوں

کسی کی یاد میں آنکھوں سے نور بہتا ہو

کسی کی یاد میں آنکھوں کو ریگ پر رکھ دوں

اگر کہو تو سر عشق میں رہوں مدہوش

اگر کہو تو یہیں سارے کر و فر رکھ دوں

پئے ادب یہ قدم بوس ہونے لگتا ہے

فرات رم میں قدم بھی کہیں اگر رکھ دوں

کسی کی یاد کی حرمت سے بچ نکلتا ہے

خیال آتا ہے سینے کو چیر کر رکھ دوں