رہ یقیں پہ گماں کا غبار آتا ہے

رہ یقیں پہ گماں کا غبار آتا ہے

جب اس کو پار کرو تب قرار آتا ہے

تمام بھیڑ چلاتی ہے اک خدا سے ہی کام

کسی کسی کے صحیفے میں یار آتا ہے

عجب نہیں ہے جو دونوں ہی ہو گئے پتھر

اسے بھی میری طرح انتظار آتا ہے

تری پسند ہی میری پسند ہے شاید

کبھی کبھی مجھے مجھ پر بھی پیار آتا ہے

دیار سینۂ خالی سے خوف مت کھاؤ

یہاں پہ دیکھنا پروردگار آتا ہے

میں گرم و سرد میں الجھا ہوں موسم دل کے

گو بارشوں کا مجھے اشتہار آتا ہے