رکھا نہیں تھا تو نے مرا دل سنبھال کر

رکھا نہیں تھا تو نے مرا دل سنبھال کر

اب کچھ نہ کر سکے گا لہٰذا ملال کر

رقصاں تھی شب کو دھوپ تمھارے خیال کی

فرصت کا چاند بیٹھ گیا دل سنبھال کر

باہر نکل کے دیکھ اندھیروں سے ایک بار

رکھا ہے روشنی نے کلیجہ نکال کر

کہتے ہیں دل جسے کہیں موجود ہی نہیں

دیکھا ہے میں نے بارہا سینہ کھنگال کر

باب قفس کھلا تھا رہا تب نہ ہو سکے

اب کیا کریں زمین سے رستہ نکال کر

آئی تھی اتنی یاد ترے جسم کی مہک

ہم چومنے لگے ترے کپڑے نکال کر