ریزہ ریزہ لمحہ لمحہ گھٹ رہی ہے زندگی

ریزہ ریزہ لمحہ لمحہ گھٹ رہی ہے زندگی

جانتے سب ہیں حقیقت عارضی ہے زندگی

لگ رہا ہے کوئی اپنا ہی نہیں جیسے یہاں

ساتھ غیروں کے ہماری یوں کٹی ہے زندگی

آتے جاتے مرحلے ہی انسیت کو کھا گئے

کوفت میں گزرے یقیناً تیرگی ہے زندگی

سب کھلاڑی ہار بیٹھے بازیاں اپنی یہاں

کھیل بھی کیا کیا نرالے کھیلتی ہے زندگی

رب سے غافل جو ہوئے تو رنج و غم ہی پاؤ گے

عین ممکن خوار ہونا لازمی ہے زندگی

جو لکیریں دیکھ کر دعویٰ خدائی کا کرے

چل نجومی یہ بتا کتنی بچی ہے زندگی

خوب اجڑا خوب سنورا آفتوں سے یہ جہاں

تا قیامت اے ثناؔ یہ آخری ہے زندگی