rida-e-la-makan meri na bazm-e-kun-fakan meri

ridā-e-lā-makāñ merī na bazm-e-kun-fakāñ merī

mujhe le aa.ī hai mahrūmī-e-qismat kahāñ merī

zabāñ-zad misra'-e-sānī hai merā ek muddat se

na sub.h-e-zū-fishāñ merī na shām-e-be-karāñ merī

kaheñ to muḳhtasar kar duuñ abhī rūdād-e-ulfat ko

farishte so na jaa.eñ sunte sunte dāstāñ merī

zamāna dars-e-‘ibrat le mire hāl-e-pareshāñ se

jahāñ dohrā rahā hai kis liye phir dāstāñ merī

talātum-ḳhez maujeñ baḌh ke mujh ko rāsta deñgī

kahāñ tak taab lā.egā ye bahr-e-bekarāñ merī

haqīqat-āshnā hotā nahīñ har āshnā merā

shab-e-ġham kyoñ nahīñ bantī hai āḳhir rāz-dāñ merī

mire ajzā-e-hastī kī ḳhabar to ḳhair kyā kahiye

yahāñ DhūñDe se kab miltī hai ḳhāk-e-āshiyāñ merī

jahāñ se naz' kī hichkī ne rokā thā fasāne ko

vahīñ se chheḌ dī aa kar ye kis ne dāstāñ merī

qafas meñ Daal dī hai āshiyāñ kī tarh bil-āḳhir

guzar jaatī vagarna 'umr-e-rafta rā.egāñ merī

kahīñ aisā na ho Thukrā duuñ bazm-e-‘ālam-e-imkāñ

mohabbat se na ho jaa.e tabī'at bad-gumāñ merī

jahāñ bhī tīliyāñ rakhtā huuñ bahr-e-āshiyāñ-bandī

vahīñ se TūTne lagtī hai shāḳh-e-āshiyāñ merī

fanā kī manziloñ se tā.ir-e-jāñ paar ho jaatā

magar had ban ga.e āḳhir yahī kaun-o-makāñ merī

yahī to baat hai jis par 'muzaffar' naaz hai mujh ko

jabīñ ko chūmtā hai pyaar se hindostāñ merī

rida-e-la-makan meri na bazm-e-kun-fakan meri

mujhe le aai hai mahrumi-e-qismat kahan meri

zaban-zad misra'-e-sani hai mera ek muddat se

na subh-e-zu-fishan meri na sham-e-be-karan meri

kahen to muKHtasar kar dun abhi rudad-e-ulfat ko

farishte so na jaen sunte sunte dastan meri

zamana dars-e-‘ibrat le mere haal-e-pareshan se

jahan dohra raha hai kis liye phir dastan meri

talatum-KHez maujen baDh ke mujh ko rasta dengi

kahan tak tab laega ye bahr-e-bekaran meri

haqiqat-ashna hota nahin har aashna mera

shab-e-gham kyon nahin banti hai aaKHir raaz-dan meri

mere ajza-e-hasti ki KHabar to KHair kya kahiye

yahan DhunDe se kab milti hai KHak-e-ashiyan meri

jahan se naz' ki hichki ne roka tha fasane ko

wahin se chheD di aa kar ye kis ne dastan meri

qafas mein Dal di hai aashiyan ki tarh bil-aKHir

guzar jati wagarna 'umr-e-rafta raegan meri

kahin aisa na ho Thukra dun bazm-e-‘alam-e-imkan

mohabbat se na ho jae tabi'at bad-guman meri

jahan bhi tiliyan rakhta hun bahr-e-ashiyan-bandi

wahin se TuTne lagti hai shaKH-e-ashiyan meri

fana ki manzilon se tair-e-jaan par ho jata

magar had ban gae aaKHir yahi kaun-o-makan meri

yahi to baat hai jis par 'muzaffar' naz hai mujh ko

jabin ko chumta hai pyar se hindostan meri