رسوا کرے مجھے کہ اسیر بلا کرے

رسوا کرے مجھے کہ اسیر بلا کرے

جو چاہے وہ مرا دل درد آشنا کرے

راضی ہوں میں وہ قتل کرے یا جفا کرے

بس میں کسی کے دل نہ کسی کا خدا کرے

موسیٰ نہ تاب لائے تبسم کی ایک دن

میں چاہتا ہوں روز یہ بجلی گرا کرے

میری طرح کا دل نہ کسی کو نصیب ہو

ان کی طرح جواں نہ کسی کو خدا کرے

مقصود امتحاں مری ہمت کا ہے اگر

ہر روز آشیانے پہ بجلی گرا کرے

بے کھٹکے آؤ حشر میں الٹے ہوئے نقاب

کس کی مجال ہے جو تمہارا گلہ کرے

ہاں مسکرا کے ناز سے انگڑائی لیجیے

بجلی کسی کے دل پہ گرے تو گرا کرے

جس دل کی شمسؔ کوئی نہ حسرت نکل سکے

مر جائے وہ غریب نہ آخر تو کیا کرے