سحر میں رنگ سحر کے سوا کچھ اور نہیں

سحر میں رنگ سحر کے سوا کچھ اور نہیں

یہ رنگ خون جگر کے سوا کچھ اور نہیں

وہ رہگزر کہ فرشتے جہاں پہنچ نہ سکیں

ہماری راہ گزر کے سوا کچھ اور نہیں

ہر اک نشاط میں جو کیف جاودانی ہے

وہ تیری مست نظر کے سوا کچھ اور نہیں

تمہارے دامن رنگیں پہ اشک غم میرے

نجوم و شمس و قمر کے سوا کچھ اور نہیں

بہت حسین ہے دنیائے رنگ و بو لیکن

بس اک فریب نظر کے سوا کچھ اور نہیں

بقول حضرت اقبالؔ آج بھی شاداںؔ

حیات ذوق سفر کے سوا کچھ اور نہیں