سحر سے شام رہتی ہے یہی مشکل مرے آگے

سحر سے شام رہتی ہے یہی مشکل مرے آگے

کبھی رستہ مرے آگے کبھی منزل مرے آگے

کبھی ماضی کی وحشت ہے کبھی فردا کی دہشت ہے

مرا مقتل مرے پیچھے مرا قاتل مرے آگے

نہ کچھ کہتے بنا مجھ سے نہ کچھ کرتے بنا مجھ سے

مرا دشمن مرے گھر میں ہوا داخل مرے آگے

سمندر کے بہت سے راز پنہاں ہیں مرے دل میں

بہت سی کشتیاں ڈوبیں سر ساحل مرے آگے

مداوا کر مداوا کر مداوا کر محبت کا

یہ کہہ کر پھوٹ کر رویا دل بسمل مرے آگے

مری دکھتی ہوئی رگ کو اچانک چھو دیا تم نے

یہ کس کا ذکر لے آئے سر محفل مرے آگے

ابھی بس خاک ہے خاشاک ہیں صحرانوردی ہے

سفر کے بعد آئے گا مرا حاصل مرے آگے