شمع نے جیسے رات سر کی ہے

شمع نے جیسے رات سر کی ہے

ہم نے بھی اس طرح سحر کی ہے

کوئے قاتل کہیں کہیں زنداں

کوئی صورت کہاں مفر کی ہے

اپنی اپنی صلیب اٹھا کے چلو

صورت اب تو یہی سفر کی ہے

منصفو حرف معذرت کیسا

ہر خطا ہم نے سوچ کر کی ہے

کتنی صدیوں کی داستان طویل

چند اشکوں نے مختصر کی ہے

شب کا افسانہ باندھنے والو

یہ بھی تمہید اک سحر کی ہے

سانس کے قافلے کا رک جانا

ابتدا اک نئے سفر کی ہے

جیسے صحرا میں آن بیٹھے ہوں

صورت ایسی کچھ اپنے گھر کی ہے

دشمنوں کا تو کچھ گلہ ہی نہیں

بات یاران معتبر کی ہے

متن کچھ اور سرخیاں کچھ اور

شکل بگڑی ہوئی خبر کی ہے

سچ اگر اک خطا ہے یزدانیؔ

یہ خطا ہم نے عمر بھر کی ہے