شعلے اگل رہی ہے زباں دیکھتے چلو

شعلے اگل رہی ہے زباں دیکھتے چلو

اٹھنے لگا دلوں سے دھواں دیکھتے چلو

یہ زندگی بھی کیا ہے کوئی کاروبار ہے

کیا ہو رہا ہے سود و زیاں دیکھتے چلو

صحرائے زندگی میں بھٹکنے کا خوف ہے

ہر نقش پائے پیش رواں دیکھتے چلو

قسمت کو تم بھی ڈھونڈ رہے ہو کہاں کہاں

محنت میں تو نہیں ہے نہاں دیکھتے چلو

یہ جانتے ہوئے کہ تمہاری روش ہے کیا

کس ڈھنگ کا ہے رنگ جہاں دیکھتے چلو

مشکل سے اب خلوص نظر آئے گا کہیں

ہر سمت حرص کا ہے دھواں دیکھتے چلو

شامل ہے اس مکاں میں پسینہ غریب کا

اشہرؔ امیر کا یہ مکاں دیکھتے چلو