sinon mein agar hoti kuchh pyar ki gunjaish

sīnoñ meñ agar hotī kuchh pyaar kī gunjā.ish

hāthoñ meñ nikaltī kyuuñ talvār kī gunjā.ish

pichhḌe hue gaañv kā shāyad hai vo bāshinda

jo shahr meñ DhūñDe hai īsār kī gunjā.ish

nafrat kī ta.assub kī yuuñ rakkhī ga.iiñ īñTeñ

paidā huī zehnoñ meñ dīvār kī gunjā.ish

pākīzgī rūhoñ kī nīlām huī jab se

jismoñ meñ nikal aa.ī bāzār kī gunjā.ish

is tarah khule dil se iqrār nahīñ karte

rakh lījiye thoḌī sī inkār kī gunjā.ish

gar azm musammam ho aur jehd-e-musalsal bhī

sahrā meñ nikal aa.e gulzār kī gunjā.ish

samjheñ ki na samjheñ vo ham ne to 'asad' rakh dī

ash.ār ke hoñToñ pe iz.hār kī gunjā.ish

sinon mein agar hoti kuchh pyar ki gunjaish

hathon mein nikalti kyun talwar ki gunjaish

pichhDe hue ganw ka shayad hai wo bashinda

jo shahr mein DhunDe hai isar ki gunjaish

nafrat ki tassub ki yun rakkhi gain inTen

paida hui zehnon mein diwar ki gunjaish

pakizgi ruhon ki nilam hui jab se

jismon mein nikal aai bazar ki gunjaish

is tarah khule dil se iqrar nahin karte

rakh lijiye thoDi si inkar ki gunjaish

gar azm musammam ho aur jehd-e-musalsal bhi

sahra mein nikal aae gulzar ki gunjaish

samjhen ki na samjhen wo hum ne to 'asad' rakh di

ashaar ke honTon pe izhaar ki gunjaish