ستارے منتظر ہیں ساز کہکشاں لئے ہوئے

ستارے منتظر ہیں ساز کہکشاں لئے ہوئے

زمیں کا چاند اٹھ رہا ہے آسماں لئے ہوئے

جو دن ڈھلا ہوا رکی کچھ ایسی شام غم جھکی

چراغ زندگی کی لو اٹھی دھواں لئے ہوئے

کٹھن اگر ڈگر میں مرحلے تو تیز تر ہوں ولولے

چلو نہ اس طرح متاع سرگراں لئے ہوئے

نہ شاخ گل نہ آشیاں مگر کریں گے خستہ جاں

طواف بوستاں ہزار داستاں لئے ہوئے

نہیں کہ زندگی ہمیں کہاں کہاں لئے پھری

ہے یوں کہ ہم گئے اسے کہاں کہاں لئے ہوئے

یہ ساز تلخیٔ زماں ہزار نغمہ بر زباں

یہ یاد مہر گل رخاں غم جہاں لئے ہوئے

بہ فیض شام میکدہ نظر کو نور ساقیا

افق پہ چھا گئی گھٹا سیاہیاں لئے ہوئے

یہ اپنا اپنا ساتھ ہے سفر سفر کی بات ہے

کہیں پہ ہم بھی آ ملیں گے کارواں لئے ہوئے

لہک لہک کے ناصحا بشارت ارم نہ دے

کہ ہم وہاں بھی رہ چکے ہیں جسم و جاں لئے ہوئے

حریف مدعی سہی مگر وہی شہابؔ ہوں

جو اب تک ہے مزاج دوستاں لئے ہوئے