soz-e-sham-e-hijr se shab jal gae

soz-e-sham-e-hijr se shab jal ga.e

Dhalte Dhalte aañsū ham ḳhud Dhal ga.e

kal kā vā'da kyā raqīboñ se kiyā

karte aaj aapas meñ kuchh kal kal ga.e

vo uThā kar yak qadam aayā na gaah

ham qadam saañ us ke sar ke bal ga.e

kab chhupī chhab taḳhtī aur vo chāl-Dhāl

go ki muñh par kar ke tum ojhal ga.e

shart thī mānūñgā jo māñgoge tum

nām-e-bosa sunte hī kuchh Tal ga.e

sāda-rū to dil ke ujle chor haiñ

haath le ye maal kurte Tal ga.e

ġhuncha-e-dil 'azfarī' taqrīb-e-sair

gul-ruḳhāñ pāmāl kar mal-dal ga.e

soz-e-sham-e-hijr se shab jal gae

Dhalte Dhalte aansu hum KHud Dhal gae

kal ka wa'da kya raqibon se kiya

karte aaj aapas mein kuchh kal kal gae

wo uTha kar yak qadam aaya na gah

hum qadam san us ke sar ke bal gae

kab chhupi chhab taKHti aur wo chaal-Dhaal

go ki munh par kar ke tum ojhal gae

shart thi manunga jo mangoge tum

nam-e-bosa sunte hi kuchh Tal gae

sada-ru to dil ke ujle chor hain

hath le ye mal kurte Tal gae

ghuncha-e-dil 'azfari' taqrib-e-sair

gul-ruKHan pamal kar mal-dal gae