سرخ رو ہوں گے محبت میں ہم انشاؔ اللہ

سرخ رو ہوں گے محبت میں ہم انشاؔ اللہ

فتح چومے گی ہمارے قدم انشاؔ اللہ

کبھی محروم نہ رکھیں گے ستم سے اپنے

ہم پہ فرمائیں گے وہ یہ کرم انشاؔ اللہ

آ گیا ہے ہمیں ہر حال میں ہنستے رہنا

اب کسی بات کا ہوگا نہ غم انشاؔ اللہ

شیخ جی ساتھ ہمارا نہیں دیتے تو نہ دیں

دل میں پچھتائیں گے خود محترم انشاؔ اللہ

کوئی اس شخص کو بھولا رہے چاہے برسوں

یاد آ جائے گا وہ ایک دم انشاؔ اللہ

بادۂ ناب کے دو گھونٹ لگا لیجئے گا

دور ہو جائیں گے رنج و الم انشاؔ اللہ

ہم نے اللہ سے امید لگائی ہے شعورؔ

رام ہو جائے گا اب وہ صنم انشاؔ اللہ