تارے جو بجھ گئے وہ مرے آسماں کے تھے

تارے جو بجھ گئے وہ مرے آسماں کے تھے

مرجھا گئے جو پھول مرے گلستاں کے تھے

جو چیخ دب گئی تھی وہ اک بے زباں کی تھی

جو نقش مٹ گئے وہ کسی کارواں کے تھے

بچے کو کھیلنے کی اجازت نہ دے سکا

مجبور تھا کھلونے وہ اس کی دکاں کے تھے

ہم سے شروع تھی نہ وہ ہم پر ہی ختم تھی

لگتا ہے اس کہانی میں ہم درمیاں کے تھے

جو آج بک رہے ہیں سجانے کو محفلیں

ہے کل کی بات وہ بھی کسی گلستاں کے تھے

بکھرے تو پھر وجود کسی کا نہ رہ سکا

ٹوٹے ہوئے یہ حصے کبھی اک مکاں کے تھے

ہر بار کر کے وار وہ اترائے تھا مگر

نادان تھا وہ وار بس اک ناتواں کے تھے

جن کے دلوں میں پیار محبت خلوص تھا

وہ کس طرح کے لوگ تھے وہ کس جہاں کے تھے