طرف داری نہیں کرتے کبھی ہم ان مکانوں کی

طرف داری نہیں کرتے کبھی ہم ان مکانوں کی

چھتیں جن کی حمایت چاہتی ہوں آسمانوں کی

یہ کالونی ہے یا بازار ہے بے روزگاروں کا

جدھر دیکھو قطاریں ہی قطاریں ہیں دکانوں کی

مرادآباد میں کاری گری ڈھوتا ہوا بچپن

لیے پھرتا ہے سانسوں میں سیاہی کارخانوں کی

اگا ہے پھر نیا سورج دشائیں ہو گئیں روشن

پرندو تم بھی اب تیاریاں کر لو اڑانوں کی

تو جس انصاف کی دیوی کے آگے گڑگڑاتا ہے

وہ تجھ کو نیای کیا دے گی نہ آنکھوں کی نہ کانوں کی

تم اس کو بے وفا اے نازؔ ثابت کر نہ پاؤ گے

بڑی لمبی سی اک فہرست ہے اس پر بہانوں کی