تیرا ہو کر کوئی کب تیرے سوا ہوتا ہے

تیرا ہو کر کوئی کب تیرے سوا ہوتا ہے

تو جو ہوتا ہے جدا کس سے جدا ہوتا ہے

حالت حال چھپائی نہیں جاتی اس سے

جب کوئی شخص تجھے سوچ رہا ہوتا ہے

کر رہا ہوتا ہوں میں اس سے محبت لیکن

دل اسے پا کے کہیں کھو بھی چکا ہوتا ہے

کس طلب سے تری آنکھوں کی طرف دیکھتا ہوں

جب ترے غم کا نشہ ٹوٹ رہا ہوتا ہے

یوں ترے شہر میں گھبرایا ہوا پھرتا ہوں

جس طرح پہلے پہل عشق ہوا ہوتا ہے

میں دلاتا ہوں یقیں اور کسی کو لیکن

دل کسی اور کے قدموں میں پڑا ہوتا ہے