تری روشنی میں نہانے لگے ہیں

تری روشنی میں نہانے لگے ہیں

مرے لفظ اب جگمگانے لگے ہیں

مرے رتجگوں سے پریشان ہو کر

ستارے کہانی سنانے لگے ہیں

خیالوں کی پرواز بڑھنے لگی ہے

خلاؤں سے پیغام آنے لگے ہیں

قمر نے خدا جانے کیا کہہ دیا ہے

سمندر کے لب تھرتھرانے لگے ہیں

ترا درد اب جاوداں ہو چلا ہے

کہ دن رات ہم مسکرانے لگے ہیں

سفر خاک میں ملنے والا ہے شاید

مسافر بگولے اڑانے لگے ہیں

تماشے کی اب انتہا ہو رہی ہے

تماشائی اٹھ اٹھ کے جانے لگے ہیں