تف بہ معشوق مزاجاں سر ہر یار پہ خاک

تف بہ معشوق مزاجاں سر ہر یار پہ خاک

ڈھل گئے ہوش تو اب خامۂ بیدار پہ خاک

زہد و بیداد بہم نعرۂ تکبیر میں ہیں

لعنتیں بر سر محراب و سر دار پہ خاک

اب سہولت بھی گئی ہاتھ سے سر پھوڑنے کی

ڈال آیا ہوں خود ہی دشت کی دیوار پہ خاک

سبز پوشاک پہ سرخی سی ابھر آئی ہے

والیٔ حرمت کعبہ تری زنار پہ خاک

روزگار اور بھی باہم ہیں جنوں کو میرے

گلشن وحشت صحرا ترے گلنار پہ خاک

آؤ اے فتنہ گرو صحن ذبیحاں کو چلیں

مل کے آ جاؤ ذرا عارض و رخسار پہ خاک

نوک مژگان جو اٹھتی ہے تو رو پڑتی ہے

وادیٔ عشق مسافت کے ہر اک خار پہ خاک

ہم حسینی ہیں وطیرہ ہی رہا ہے اپنا

آج کے آج ہی مل دیں تری تلوار پہ خاک