تجھ تک آنے جانے میں ہی ٹوٹ گئے

تجھ تک آنے جانے میں ہی ٹوٹ گئے

دیوانے ویرانے میں ہی ٹوٹ گئے

وہ اوروں کو کاندھا دینے والے تھے

اپنا بوجھ اٹھانے میں ہی ٹوٹ گئے

ہم جو اچھے فنکاروں میں شامل تھے

اک کردار نبھانے میں ہی ٹوٹ گئے

ہونٹھوں تک تو صرف تمازت ہی پہنچی

نشے تو پیمانے میں ہی ٹوٹ گئے

کیا ان کا پھر حال تباہی میں ہوتا

وہ تو خیر منانے میں ہی ٹوٹ گئے

ہم کو اپنے ساتھ گزارہ کرنا تھا

ہم خود کو سمجھانے میں ہی ٹوٹ گئے

اوپر تو بس چاندی سونا ہی آیا

موتی تو تہہ خانے میں ہی ٹوٹ گئے

تم کو ساری رات کہانی کہنی تھی

تم تو اک افسانے میں ہی ٹوٹ گئے