تمہاری داستانوں کے بہانے لکھ رہے ہیں ہم

تمہاری داستانوں کے بہانے لکھ رہے ہیں ہم

حصار ذات کے تاریک خانے لکھ رہے ہیں ہم

ابھی تک لکھ رہے تھے صرف زخموں کا پتہ لیکن

اب اپنے درد کے سارے ٹھکانے لکھ رہے ہیں ہم

ہمارے حال پر کوئی ترس کھائے تو کیا کھائے

ہجوم یاس میں بیٹھے ترانے لکھ رہے ہیں ہم

ہمیں خوابوں کی دنیا تو میسر ہو نہیں پائی

مگر خوابوں کی دنیا پر فسانے لکھ رہے ہیں ہم

غزل کہنے کی کوشش کر رہے ہیں دھوپ میں جل کر

نئی نسلوں کی خاطر شامیانے لکھ رہے ہیں ہم

چلو پھر زندگی میں اک نیا کردار لے آئیں

کئی دن سے وہی قصہ پرانے لکھ رہے ہیں ہم

حقیقت تو ہمیں اجڑے مناظر ہی دکھاتی ہے

مگر سپنے نہ جانے کیوں سہانے لکھ رہے ہیں ہم