تو رفیق جان ہے عذر کیا مرے ساتھ چل مرے ساتھ آ

تو رفیق جان ہے عذر کیا مرے ساتھ چل مرے ساتھ آ

مرا ہم سفر بھی تو بن ذرا مرے ساتھ چل مرے ساتھ آ

مرے دوست جانب مے کدہ مرے ساتھ چل مرے ساتھ آ

میں دکھاؤں رندوں میں پارسا مرے ساتھ چل مرے ساتھ آ

یہ ہے کھیل تیرہ نصیب کا جو ہر ایک چھوڑ کے چل دیا

مرا سایہ بھی تو نہ کہہ سکا مرے ساتھ چل مرے ساتھ آ

مری وحشت اور بڑھا گیا وہ بگولہ کہتا گزر گیا

تجھے صحرا صحرا گھماؤں گا مرے ساتھ چل مرے ساتھ آ

میں فریب دہر میں آ گیا تو مرا ضمیر پکار اٹھا

تو زمانہ ساز نہ بن سکا مرے ساتھ چل مرے ساتھ آ

یہ مری خودی یہ مری انا میں جہاں کھڑا تھا وہیں رہا

مجھے وقت کہتا ہی رہ گیا مرے ساتھ چل مرے ساتھ آ

وہاں ذکر فکر و الم نہیں وہاں حادثوں کا گزر نہیں

یہ کسی نے شادؔ نہیں کہا مرے ساتھ چل مرے ساتھ آ