ان پہ آئی کہاں ٹلی ہے ابھی

ان پہ آئی کہاں ٹلی ہے ابھی

ذکر میرا گلی گلی ہے ابھی

ہر طرف شور نوبہار سہی

دم بخود پھر بھی ہر کلی ہے ابھی

جان دینا جنوں سہی لیکن

رسم دنیا میں یہ بھلی ہے ابھی

میری صورت پہ بھولنے والے

ان کے وعدوں میں یہ ڈھلی ہے ابھی

غنچۂ دل کبھی کھلے شاید

زندگی کی ہوا چلی ہے ابھی

اک امید سحر ہے رات کے پاس

اس کے خوں میں یہی پلی ہے ابھی

اور کیا ہوں گے زیست کے آثار

مجھ سے پیوستہ بیکلی ہے ابھی

جانے کیوں کر ہوا نظرؔ خاموش

بزم عالم میں کھلبلی ہے ابھی