اس کے دل میں جو بند رہتا ہے

اس کے دل میں جو بند رہتا ہے

زندگی بھر وہ راز کھلتا ہے

مور کے پاؤں میں جو کانٹا ہے

مور کے ساتھ ساتھ ناچا ہے

ہم بتاتے ہیں مسئلہ کیا ہے

لوگ کہتے ہیں شعر اچھا ہے

کس کی آنکھوں سے کون روتا ہے

صرف اللہ جان سکتا ہے

میرا کچھ مانگنا گزارش ہے

اس کا کچھ مانگنا تقاضہ ہے

دیر تک ناچنے نہیں دیتا

ذہن و دل پہ جو بوجھ رکھا ہے

کوئی چادر وفا نہیں کرتی

وقت جب کھینچ تان کرتا ہے

آپ کے بھیس میں ابھی ہم نے

آپ کا انتظار دیکھا ہے

اپنے اپنے مغالطے ہیں میاں

ورنہ دنیا میں کون کس کا ہے