ورق ورق کوئی حرف دعا چمکتا ہے

ورق ورق کوئی حرف دعا چمکتا ہے

مری کتاب میں کس کا لکھا چمکتا ہے

یہ ایسے دن تو نہیں ہیں کہ روشنی ہو بہت

بہ فیض شوق مرا راستہ چمکتا ہے

مرے وجود میں تیرا وجود ایسے ہے

درخت زرد میں جیسے ہرا چمکتا ہے

نہیں ہے میری ریاضت کا اس میں کوئی دخل

ترے خیال سے غار حرا چمکتا ہے

یہ روشنی میں کوئی اور روشنی کیسی

کہ مجھ میں کون یہ میرے سوا چمکتا ہے

میں ایک بار تو حیران ہو گیا ثانیؔ

یہ میرا عکس ہے یا آئنہ چمکتا ہے