وہ بظاہر عیاں نہیں ہوتا

وہ بظاہر عیاں نہیں ہوتا

پھر بھی سب سے نہاں نہیں ہوتا

وہ اگر مہرباں نہیں ہوتا

یہ مکمل جہاں نہیں ہوتا

اس ہنر سے وہ زخم دیتے ہیں

جن کا کوئی نشاں نہیں ہوتا

خود سے کرتا ہوں ذکر ماضی کا

جب کوئی ہم زباں نہیں ہوتا

پھر سے دے گا کوئی صدا مجھ کو

اب تو یہ بھی گماں نہیں ہوتا

ہے یقیناً کوئی کمی اپنی

ورنہ وہ بد گماں نہیں ہوتا

درمیاں تھی کوئی انا ورنہ

میں یہاں وہ وہاں نہیں ہوتا

آزمائش ہماری برسوں سے

اس طرح امتحاں نہیں ہوتا

جن کے ذہنوں میں بے نیازی ہو

ان کا کوئی جہاں نہیں ہوتا