وہ حسرتوں کا مری قتل عام کر دیں گے

وہ حسرتوں کا مری قتل عام کر دیں گے

کسی بھی روز وہ اس دل کا کام کر دیں گے

تمہاری زلف کے پھندے سے خودکشی کر کے

تمہارے ظلم کا قصہ تمام کر دیں گے

ہمارے ساتھ رہو وادیٔ سخن میں ذرا

ہمارے ساتھ چلو خوش کلام کر دیں گے

سحر سے بیٹھے ہیں فرش نظر بچھا کر ہم

وہ آتے آتے یہاں تک تو شام کر دیں گے

بس ایک بار اسیر دیار دل ہو جاؤ

زمانے بھر کو تمہارا غلام کر دیں گے

فراق یار میں مریمؔ نئی غزل کہہ کر

ہر ایک حرف سخن اس کے نام کر دیں گے