وہ کبھی آگ سے لگتے ہیں کبھی پانی سے

وہ کبھی آگ سے لگتے ہیں کبھی پانی سے

آج تک دیکھ رہا ہوں انہیں حیرانی سے

آ ہی ملتا ہے سرا رات کے سناٹے کا

صبح کے وقت پرندوں کی غزل خوانی سے

لوگ غاصب نہیں حق دار سمجھتے ہیں مجھے

بے گھری لاکھ غنیمت ہے جہانبانی سے

آدمی بن کے مرا آدمیوں میں رہنا

ایک الگ وضع ہے درویشی و سلطانی سے

ترک کرتا ہوں تو قطرہ بھی نہیں چکھتا ہوں

اور پیتا ہوں تو پیتا ہوں فراوانی سے

صرف اللہ کا کیا ذکر بتوں کو بھی شعورؔ

ہم نے چاہا ہے بڑے جذبۂ ایمانی سے