وہ کہہ رہے ہیں جو ہم سے خدا کی حمد لکھیں

وہ کہہ رہے ہیں جو ہم سے خدا کی حمد لکھیں

بتائیں کون سے کس کے خدا کی حمد لکھیں

بہت سے لڑتے جھگڑتے ہوئے خداؤں کی حمد

کہ سب سے دور اکیلے خدا کی حمد لکھیں

جو آسمان پہ رہ کر زمیں پہ حکم چلائے

نہ ہو گا ہم سے کہ ایسے خدا کی حمد لکھیں

خدا وہ ہے جو مزے دے ہمیں محبت کے

وہ ہو تو ایسے مزے کے خدا کی حمد لکھیں

خدا وہ ہے جو نشے میں ہمیشہ دھت رکھے

ملے تو ایسے نشیلے خدا کی حمد لکھیں

خدا وہ ہے جو بنا ہو ہماری مٹی سے

تو ایسے خاک کے پتلے خدا کی حمد لکھیں

خدا وہ ہے جو لگا ہو ہمارے پہلو سے

تو جسم یار کے جیسے خدا کی حمد لکھیں

ہمیں دلاؤ خدا کوئی جسم و جاں والا

کہ جسم و جان لگا کے خدا کی حمد لکھیں

یہ گوشت پوست کا معشوق ہے تو پھر احساسؔ

غضب کہ روح کے مارے خدا کی حمد لکھیں