وہ میرا ہو کے بھی میرا نہیں ہے

وہ میرا ہو کے بھی میرا نہیں ہے

کبھی جس کے سوا سوچا نہیں ہے

کھلونوں سے بہل جائے یہ کیسے

مرا دل ہے کوئی بچہ نہیں ہے

ہے کاسہ دید کا مدت سے خالی

سخی کوئی یہاں آیا نہیں ہے

اداسی کا ہر اک لب پر ہے پہرہ

یہاں پر کیا کوئی ہنستا نہیں ہے

سنا ہے کار بھی اڑنے لگی ہے

پرندہ من کا کیوں اڑتا نہیں ہے

ہمارے ضبط کی حد ہو گئی کیا

اب آنسو آنکھ میں رکتا نہیں ہے

بدل جاتی ہے فطرت بھی یہاں پر

جلے جب دل دھواں اٹھتا نہیں ہے

وہاں پر کیا خضرؔ دل کا لگانا

جہاں کوئی سدا ٹھہرا نہیں ہے