یار کا کردار آئینہ نبھا سکتا نہیں

یار کا کردار آئینہ نبھا سکتا نہیں

یہ تماشہ دیکھ سکتا ہے دکھا سکتا نہیں

اتنی باتیں کر چکا ہوں اک خیالی یار کی

عشق پہلا ہے مگر پہلا بتا سکتا نہیں

سب کتابوں میں رکھے وہ پھول اب بے کار ہیں

میں پرانی دھوپ میں جن کو کھلا سکتا نہیں

اب بہت مشکل ہے پیچھا چھوٹنا مجھ سے ترا

بے وفا ہونا بھی تیرے کام آ سکتا نہیں

سسکیوں میں ساتھ دے سکتا ہے رونا ہو جسے

قہقہہ اس کے لئے جو مسکرا سکتا نہیں

تیری جتنی پینے والے تو بہت ہوں گے مگر

تیرے جیسا کوئی شارقؔ لڑکھڑا سکتا نہیں